Fietsryers durf Brug na Berg-langpad aan
Die jaarlikse Brug na Berg Fietsrit is weer Saterdag gehou en 11 fietsryers van Mokopane het die kilometers plat getrap.
MOKOPANE – Carel Taljaard, organiseerder van die Mokopane skof, vertel Mokopane is die derde rit van die 21 skofte wat gery word. Die fietsryers ry 140 km tot in Bela-Bela.
“Ek is dankbaar om te sien dat belangstelling toegeneem het. Verlede jaar was daar ses fietsryers en vanjaar het daar vyf bygekom.”
Jakkie van der Kolff (76), die stigter van die fietsrit, sê dit is die tweede Brug na Berg fietsrit.
“Dit is wanneer fietsryers van Beitbrug tot Kaapstad (Tafelberg) ry. Die afstand is ongeveer 2 200 km en in 21 skofte ingedeel. Elke groep ry hul skof afsonderlik en op dié manier word die afstand in minder as 12 ure afgelê.”
Van der Kolff sê dit is nie ‘n wedren nie, maar ‘n rit waar daar langs die pad gestop word vir ontbyt of middagete en daar word selfs vleis gebraai. “Dit is ‘n fietsrit vir oud en jonk om die veiligheid van fietsryers en fietsry as ‘n gesinsport te bevorder.”
Van der Kolff sê Saterdag se fietsrit was vir drie fietryers besonders. “Die oudste fietsryer was 75 jaar oud wat van Louis Trichardt tot by Polokwane gery het. Die jongste ryer was ‘n meisie van agt jaar en sy het 26,5 km afgelê en ‘n seun van 11 jaar het 130 km gery van Hopetown tot by Britstown. So jy het nie ‘n verskoning nie, daar is nie so iets soos te jonk of te oud nie. Volgende jaar wil ons ‘n rekordgetal inskrywings hê.”
redaksie.bosvelder@nmgroup.co.za
