Sewesspan reken af met opponente
Die rugbyveld van die Hoër Tegniese Skool Tom Naudé het behoorlik gegons soos wat die spelers geoefen en mekaar getakel het in die proefwedstryde om 'n sewesspan te kies.
POLOKWANE – Rugbyspelers wie graag wou deel wees van die Pietersburg/Dendron Rugbyklub-span het die velde trotseer vir die klubs se proewe.
Die rugbyveld van die Hoër Tegniese Skool Tom Naudé het behoorlik gegons soos wat die spelers geoefen en mekaar getakel het in die proefwedstryde om ‘n sewesspan te kies.
Die span is op Donderdag, 16 Februarie gekies en het daardie Saterdag al in hul eerste wedstryd in Groblersdal gaan kragte meet.
Die afrigter van die sewesspan, Jacques Swanepoel, sê tussen die twee klubs is daar talle gretige en talentvolle spelers.
“Ondanks dat die twee klubs taamlik klein is, is daar ‘n oorvloed van talentvolle spelers om van te kies.
Die nuwe sewesspan het goed met hul opponente afgereken in die onlangse wedstryde al het hulle slegs ‘n kort rukkie voor die wedstryd eers begin saam speel,” vertel hy.
Uitslae van die Groblersdalwedstryde:
• Pietersburg/Dendron Rugbyklub klop Loskop 2 met 32-10.
• Pietersburg/Dendron Rugbyklub klop Universiteit van Limpopo 1 met 65-0.
• Pietersburg/Dendron Rugbyklub veloor 7-14 teen Universiteit van Venda.
• Pietersburg/Dendron Rugbyklub verloor 14-12 teen Loskop in die semifinaal.
