VANDERBIJLPARK – Die Vaal het rede om trots te wees nadat die plaaslike inwoner Florika Viljoen aangewys is as een van die Top 30-finaliste van die Mev Suid-Afrika 2026-kompetisie.
Viljoen het haar plek onder die land se topdeelnemers verseker tydens die glansryke halfeindronde wat Vrydag 3 Julie by die Theatre of Marcellus by Emperors Palace aangebied is.
Die halfeindweek het op 1 Julie afgeskop met bemagtigingswerksessies, waarna deelnemers aan swemdragbeoordeling en geslote onderhoude deelgeneem het.
Beoordelaars het deelnemers geëvalueer op grond van leierskap, doelgerigtheid, gemeenskapsbetrokkenheid, persoonlike groei, kommunikasievaardighede en hul potensiaal om as ambassadeurs vir die Mev Suid-Afrika-handelsmerk op te tree.
Die swemdragafdeling het selfvertroue, geloof in jouself en die deelnemers se toewyding aan hul gesondheid en welstand beklemtoon, terwyl dit ook ‘n geleentheid gebied het om hul individualiteit en selfversekerdheid ten toon te stel.
Volgens die uitvoerende hoof van Mev Suid-Afrika, Joani Jacobs, het die kompetisie oor die jare ontwikkel tot veel meer as ‘n skoonheidskompetisie en dien dit vandag as ‘n program vir vrouebemagtiging, vaardigheidsontwikkeling en professionele mentorskap.
Sy het gesê elke deelnemer bring ‘n unieke verhaal saam en dat vanjaar se Top 30 uitsonderlike groei en leierskapspotensiaal getoon het.
Ná die aankondiging van die Top 30 het Viljoen saam met die ander finaliste ‘n strategiese werksessie bygewoon waar onder meer media-onderhoude, persoonlike handelsmerkontwikkeling en openbare spreekvaardighede behandel is. Die groep het daarna ook aan hul eerste amptelike fotosessie deelgeneem.
As deel van die volgende fase van die kompetisie sal elke finalis ‘n fondsinsameling ten bate van een van Mev Suid-Afrika se amptelike liefdadigheidsvennote aanbied, naamlik die 4Change Foundation, The Society for Animals in Distress (SAID) of die Kankervereniging van Suid-Afrika (CANSA).
Viljoen sal nou haar reis na die Mev Suid-Afrika 2026-eindstryd voortsit as een van slegs 30 finaliste wat uit deelnemers van regoor Suid-Afrika gekies is.
Top 30-finaliste van Mev Suid-Afrika 2026: Adre Muller (Pretoria), Aleche Landman (Limpopo), Andrea Raaths-Duarté (Pretoria), Angelique Janse van Rensburg (Centurion), Angie Calo (Umhlanga), Aobakwe Sebokoane (Roodepoort), Carolize Delport (Bloemfontein), Chanelle Badenhorst (Kaapstad), Charne Bell (Johannesburg), Dineo Ntsoane (Secunda), Flo Mabee (Pretoria), Florika Viljoen (Vanderbijlpark), Gavaza Mongwe (Midrand), Heleen Fourie (Mpumalanga), Khanyisa Phika (Olivedale), Lauren-Marie Mkungela (Johannesburg), Lisinda Grobbelaar (Rustenburg), Lomile Dithakong (Bloemfontein), Mariette Vorster (Langebaan), Meghan Cyster (Paarl), Melissa Scott (Polokwane), Nadia Pereira (Johannesburg), Ntsaky Maluleke (Midrand), Pertunia Nkomo (Shoshanguve), Shoma Govender (Edenvale), Sinempilo Ngubane (Everton), Stephanie Harris (Sunningdale), Tracey Elliott (Kaapstad), Trudie Oosthuizen (Kempton Park) en Tsakani Mangolele (Polokwane)
