VANDERBIJLPARK. – Shamoné Steynvaart, ‘n graad 9-leerling van Hoërskool Driehoek, is een van die kinders wat gister erg in die tragedie beseer is toe ‘n oorhoofse betonstruktuur by die skool inmekaargestort het. Van haar rugwerwels is gebreek en haar rugmurg is beskadig.

Volgens ‘n familielid, Debbie Steynvaart, het Shamoné ook ‘n ernstige besering aan haar agterkop. Sy sou gistermiddag of -aand vanaf Mediclinic Vereeniging na die Wilgers-hospitaal in Pretoria oorgeplaas word vir verdere behandeling.
Haar familie vra dat almal haar asseblief vandag spesiaal in hul gebede en gedagtes moet hou.