Sentraal Gemeente se Pretloop wyd ondersteun
Die hitte het nie nie atlete afgesit nie. Almal het deelgeneem van die ernstige atlete wat tyd dopgehou het tot by die geselsende stappers.
VANDERBIJLPARK – Wanneer Sentraal Gemeente ʼn pretwedloop aanbied, dan gaan hul groot. Verlede Saterdag het atlete van alle ouderdomme aangetree om die 4- of die 8-km-wedloop aan te durf wat deur die omliggende woonbuurt gekronkel het.
Langs die roete was daar drie waterpunte en 18 beamptes wat ʼn oog oor alles gehou het. Een van die waterpunte is deur die VF Plus beman en die atlete is verwelkom met koue water terwyl Afrikaanse musiek hul sommer weer woema gegee het.
Die wedloop het om 09:00 begin en die son het genadeloos korrel gevat. Gelukkig was daar groot gedeeltes waar ou koeltebome skadu gebied het vir die atlete.
Die doel van die Pretwedloop was om die gemeenskap weer bewus te maak van hardloop en sodoende daardie kultuur weer te vestig.
Die 4 km seniors is deur Clare Marnitz gewen, met Werner Barnard tweede, Pieter Steyn derde, Donné van Zyl vierde en Renier Bosman vyfde.
Die 4 km juniors is deur die 11-jarige Nico Alberts gewen, met Marnu Roux tweede en derde Herminé Behr.
In die 8 km wedloop was Petrus Tsotetsi eerste, gevolg deur Christo Crause in die tweede plek en Peet Maritz in die derde plek.
