VEREENIGING. – Die polisie is Dinsdagaand (1 September) ontbied toe inwoners van Redan glo voor die huis van Daniel Jacobus “Daan” Opperman Lowings, ’n welbekende vullisverwyderaar wat van moord aangekla word, saamgedrom het.  

Inwoners dring aan dat Lowings die woonbuurt verlaat na ’n skietvoorval Maandagaand.  

Lowings het vanoggend in die Vereeniging-landdroshof verskyn op die moord van die 60-jarige Leon du Toit. Na bewering is hy reeds op borgtog vrygelaat.

Ontstoke inwoners het na sy huis opgeruk om protes aan te teken.

Lowings het glo vir Du Toit Maandagmiddag tydens ’n onderonsie oor tuinstoele in die kop geskiet.