VANDERBIJLPARK – Wanneer jou hart warm klop vir diere, dan maak jy ʼn plan om die viervoetiges met jou entrepreneursdagprojek te help.

Dis presies wat Adelie du Toit en Miané Lucas tydens Laerskool D.F Malherbe se entrepreneursdag vir Graad 7’s gedoen het.

Die twee het met hul vrolike stalletjie, Die Troeteltuin, geld ingesamel om Vaalpets Rescue Centre te ondersteun. Saterdag het hulle Vaalpets besoek om die donasies, hondekos en snoepgoed af te lewer.

Vaalpets se stigter, Danielle van Rooyen was daar om hulle te ontvang. Die duo het die kans gebruik om bietjie met die jong hondjies te speel en ʼn toer deur die groter kampe geneem.

Vaalpets het op hul Facebookblad gesê hulle is baie dankbaar vir Adelie en Miané. “Jul vrygewigheid gaan ʼn regte verskil maak vir die honde van Vaalpets. Baie dankie ook aan al die leerders en ouers wat Adelie en Miané ondersteun het.”