VEREENIGING. – Verskeie organisasies het Saterdagoggend 5 September moue opgerol en gehelp om die Vredesmonument in Vereeniging se middestad te verfraai.   Die monument waarop die woorde “Gewond maar onoorwonne” verskyn staan voor die Burgesentrum in Vereeniging en  herinner aan die Vredesverdrag wat op 31 Mei 1902 tussen boer en Brit onderteken is.   Die palisadeheining rondom die monument is geverf, bome is gesnoei, onkruid is uitgetrek, gras is gesny en rommel is opgetel.   Lede van verskeie organisasies, insluitend die Federasie van Afrikaanse Kultuurvereniginge (FAK), Vryheidsfront Plus, Die Voortrekkers, die Genealogiese Genootskap van SA (Vaal) en die Vaaldriehoek se weermagveterane het aan die aksie deelgeneem.   Die bekende politikus en voormalige Vryheidsfront Plus-leier, dr. Pieter Mulder, het die geleentheid bygewoon en almal teenwoordig ingelig oor die geskiedenis van die monument en die simboliek daaragter.