Polisieduikers se soektog na vier duur voort
VEREENIGING. – 'n Tragedie het gistermiddag op die Vaalrivier afgespeel toe vyf van die sewe mense wat op hul boot gekuier het, verdrink het toe die boot begin water kry en omgekantel het. Een van die vyf oorledenes se lyk is gister gekry, maar duikers is tans besig om na die ander vier se lyke te soek. Volgens die polisieduikers neem dit somtyds tot drie dae voordat lyke in die Vaalrivier gevind word.
Die tragedie het gistermiddag naby Spider Valley gebeur. ER24 se nooddienste, asook die polisie het gister net voor 18:00 by die toneel opgedaag. Dit wil voorkom of die mense op die boot na een kant van die boot beweeg het toe die boot begin water kry het, wat uiteindelik daartoe gelei het dat die boot omgekantel het. Die oorledenes se identiteite is nog nie bekend gemaak nie, maar volgens gerugte is een van die oorledenes ‘n dokter van Emfuleni Privaat Hospitaal.
* Behalwe vir dié tragedie het paramedici gister enkele ure tevore ‘n man en ‘n vrou in hul veertigs behandel na ‘n snelboot en ‘n waterponie naby Vaal Marina gebots het. Die man en vrou is per helikopter hospitaal toe geneem. Na wat verneem word het nog twee insittendes ligte beserings opgedoen. Die bestuurder van die waterponie het glo ongedeerd daarvan afgekom. Hy het glo beheer oor sy waterponie verloor en teen die boot gebots.
