VANDERBIJLPARK. – Vaalweekbladlesers het in Maart vanjaar kennis geneem van die ongebore tweelingseuntjies, Luka en Liam, vir wie ‘n Backabuddy-projek begin is om geld vir hul geboorte in te samel. Vaalweekblad het toe gerapporteer dat Luka gedurende die swangerskap met “Hypoplastic Left Heart syndrome” gediagnoseer is, wat beteken dat net die regterkant van sy hartjie werk.
Danksy Vaalweekbladlesers en ander mense wat goedgunstiglik bygedra het, kan die geboorte nou in ‘n privaathospitaal, Emfuleni Mediclinic, plaasvind, waar daar ‘n intensiewe sorgeenheid is om babatjies soos Luka na die geboorte gemaklik te hou. Sy lewe word egter steeds bedreig deur sy hartprobleem. Slegs ‘n wonderwerk kan hom red, sê hul ouma, mev. Suzette Hall.
Mamma Chavonne is reeds in die hospitaal en die keiser word moremiddag omstreeks 17H00 gedoen.
Hou die gesinnetjie asseblief in julle gedagtes en gebede. Dit is ‘n baie stresvolle tyd vir al die betrokkenes want daar lê beslis nog ‘n groot stryd voor.
* Ouma Suzette bedank almal wat vir hulle bid en sê ook baie dankie aan almal wat tot dusver geld bygedra het.
***********************************************************************************
