DUNCANVILLE – Tyson, die hond wie se asemhalingsprobleme tot ’n pleidooi om hulp gelei het, het vandag (28 Oktober) sy operasie ondergaan en word oornag by die veearts gehou.

Volgens ’n boodskap van sy eienaar, Amy Saunders, het die operasie goed afgeloop. Die veearts sal hom oornag dophou om te sien hoe hy ná die prosedure aanpas.

Vaalweekblad het op 17 Oktober berig dat Saunders R10 000 probeer insamel om vir Tyson se operasie te betaal. Op daardie stadium was slegs R650 ingesamel.

Die bedrag op sy BackaBuddy-blad het intussen tot R13 700 gestyg – R3 700 meer as die oorspronklike teiken.

Volgens Saunders het ’n ingevalle klep dit vir Tyson moeilik gemaak om asem te haal. Hy het ’n operasie nodig gehad om die probleem te behandel.

“Tyson is deel van ons gesin. Ons wil hom die kans gee om makliker asem te haal en weer sy lewe te geniet,” het sy destyds gesê.

Indelicate Pitbull Rescue Cape Town het ook hand bygesit deur R500 te skenk en sy ondersteuners op Facebook uit te daag om elk R50 by te dra.

Die organisasie het beklemtoon dat selfs mense wat hul diere liefhet en versorg, soms hulp met veeartskoste nodig het. Ondersteuners wat nie kon skenk nie, is gevra om Tyson se verhaal te deel.

Die geldinsameling het egter ook ’n nare wending gehad toe ’n swendelaar die situasie uitgebuit het. Sommige mense het gevolglik geld in die verkeerde rekening inbetaal.

Die gesin het almal bedank wat met skenkings en die deel van die veldtog gehelp het.

Hoewel die operasie volgens die jongste terugvoer goed afgeloop het, word Tyson se herstel steeds gemonitor.