Haas Das voer onderhoud by Kollegepark
Wie onthou nog vir Haas Das se Nuuskas vroegaand net na 6? Laerskool Kollgegepark het onlangs van ou Haas Das se dienste gebruik gemaak.
VANDERBIJLPARK. – Haas Das was ‘n bekende en beminde nuusleser wat vandag se kinders se ouma’s en oupa’s weekliks op die kassie vermaak het. Hy en Piet Muis het die nuus uit Diereland gebring.
Van Haas Das se ou nuusberigte kan nog op YouTube gesien word, maar in persoon is hy lanklaas gewaar. Daarom was daar groot opgewondenheid toe “Haas Das” met die” skoolhoof” ‘n onderhoud kom voer het om die voornemende graad RR leerders van 2022 na ‘n ope dag by die skool uit te nooi.
Die video kan by https://fb.watch/5B-ai_RVQf/ gekyk word. Die leerlinge en personeel van Laerskool Kollegepark glo in spanwerk en gaan uit hul pad om die opedae vir volgende jaar se graad RR, R en graad 1’s so opwindend en lekker moontlik te maak.
Die graad 1’s se opedag is met ‘n reeks sirkus video’s aangekondig en kan ook almal op die skool se Facebook blad gekyk word.
Die graad R klas van 2022 het op 18 Mei ‘n Koekeloertoer by die skool gehad waar hulle die graad R-onderwyseresse ontmoet het, die klasse kon besigtig het en elkeen met ‘n soetigheidjie bederf is.
Die skool se boodskap aan die voornemende graad R leerlinge was: “Waarom inpas as jy gebore is om uit te staan? By ons is elke graad R-leerder uniek.”
Die opedag vir die voornemende graad RR maats vind plaas op 4 Junie om 14:00 en die graad 1 opedag op 26 Mei. Gaan besoek gerus die skool se Facebookblad by Laerskool Kollegepark vir meer inligting.
