VANDERBIJLPARK. – Met die nasioanle jeugweke wat vroeër vandeesweek deur SA Rugby vir die tweede agtereenvolgende jaar weens die Covid-pandemie gekanselleer is, is vriendskaplike kragmetings die enige dis op die spyskaart.

Die o.14 en o.17-rugbyspanne van die Hoërskool Transvalia en Kempton Park het Vrydag 27 Augustus by dié eengang maaltyd met grommende magies aangesit. Honger is die beste kok… Mens kon sien. Die spelers was lus vir rugby en hoewel afronding hier en daar ontbreek het, was die wedstryde ‘n vertoonvenster vir skolerugby.

Valia se o.14’s was in ‘n goeie kragmeting met 22-15 baas en die o.17’s het met sy sege met 17-5 oor die Oos-Randers gewys dat die ligbloues aanstaande jaar met goeie diepte by sy eerste span gaan spog. Veral sy agttal se vertoning in die vaste skrums was iets om oor opgewonde te raak.