Inwoners van die Vaal moes koes vir wolkbreuk en hael
Sonlandpark en Unitaspark het blykbaar die meeste reën gekry
Soos gepubliseer in Vaalweekblad se uitgawe van 16 Februarie 2022
‘n Wolkbreuk en gepaardgaande hael het Donderdag, 10 Februarie, plek-plek groot skade in Vaaldriehoekse woonbuurte aangerig, terwyl dit in ander buurte feitlik niks gereën het nie. Dit blyk dat Sonlandpark en Unitaspark die meeste reën gekry het. Vereeniging en Vanderbijlpark se sakesentrums sowel as die suidelike woonbuurte het ook kwaai deurgeloop.
Rensia Bester en Louis Naudé van Sonlandpark rapporteer onderskeidelik dat 90 mm en 78 mm in hulle gebied geval het. Christo en Irna Valentine sê hulle het 83mm hier aangeteken. Jurie Nel van Unitaspark het 90 mm reën gekry en Renier van Vuuren van Duncanville het 70 mm gemeet. Sommige inwoners van Duncanville het egter baie minder aangeteken. Johan Koekemoer sê hy het net 11 mm hier gemeet.
Adriaan Fouché van SE2, Vanderbijlpark, sê dit het tussen 16:30 tot 17:30 die middag 38 mm by hom gereën. Jan Theron van SE3, Vanderbijlpark, het 50mm aangeteken maar sê dit kon dalk onakkuraat wees as gevolg van die hael. Marius Kriel van die suidelike deel van SE3 laat weet dat hy 60 mm gemeet het.
Vaalpark het ook heelwat reën en hael gekry en ‘n paar Vaalweekblad-lesers uit daardie gebied het gerapporteer dat hulle skade aan hul huise se dakke of afdakke het. Mandie Coetzer sê sy het in die relatief kort tyd wat dit gereën het, 30mm in Stormbergstraat, Vaalpark, gemeet.
In gebiede soos Drie Riviere het dit egter baie min gereën. Jan Pansegrouw van dié woondeel sê hy het slegs 2 mm aangeteken. In Meyerton het dit ook baie min gereën. Len Langenhoven van Kookrus in die Midvaal-gebied, rapporteer dat dit daar net 3mm gereën het. “Met nege haelkorrels,” voeg hy by. Volgens Susan du Toit van Meyerton Kleinplasies se reënmeter het dit 5mm by hulle gereën.
Ondanks skade wat plek-plek deur die reën en hael aangerig is, behou Vaalweekbladleser darem hul humorsin. Fred van der Walt sê in sy slaapkamer het dit 5 liter gereën, in sy badkamer 2 liter en in sy sitkamer 10 liter.
Dié foto is Donderdagmiddag, 10 Februarie, tydens die wolkbreuk voor Mienies Shopping Center in Springboklaan, Duncanville, geneem. Foto: Hannelie Mienie.
********************************************************************************
