Talle inwoners van die Vaaldriehoek rapporteer dat hulle sedert Vrydag (8 April 2022) tussen 40mm en 100mm reën gehad het. In sommige dele, soos Sasolburg, Vaalpark en die suide van Vanderbijlpark het dit ook heelwat gehael, hoewel min skade aangemeld is. Die korrels was gelukkig klein en die haelbui het met min wind gepaard gegaan.

Verskeie laagliggende areas van die Vaaldriehoek is tans risiko-gebiede vir motoriste. Een daarvan is die duikweg in Boy Louwweg, Vereeniging, waar daar teen gisternamiddag reeds baie water was. Dit lyk waarskynlik vanoggend steeds so of erger.  Beplan dus ‘n alternatiewe roete as jy vandag in daardie omgewing moet ry.