Dis paartyd vir die pofadders en hoewel die temperatuur al heelwat koeler is, is die rinkhalse ook nog op warm dae bedrywig in hul soeke na die hitte van die son.

Plaaslike Netcare 911 nooddienswerker en gekwalifiseerde slanghanteerder, Nick van der Walt, moes die afgelope seisoen verskeie kere help om rinkhalse in die Vaaldriehoek-omgewing te verwyder.

Sy hulp is vandag weer ingeroep om saam met die Midvaal Brandweer  ‘n rinkhals in Valley Settlements, Randvaal te gaan verwyder.

Nick moes ook ‘n paar dae tevore ‘n pofadder by New Vaal Collieries gaan uithaal.