Die buurte van Drie Riviere en Risiville in Vereeniging is sonder krag nadat ’n transformator van die Emfuleni Plaaslike Munisipaliteit Donderdagoggend (18 Augustus 2022) kort na 07:30 in die oggend ontplof het.
Die ontploffing het by ’n substasie in Risiville plaasgevind. ’n Transformator van die Midvaal Plaaslike Munisipaliteit wat reg langs die transformator van Emfuleni Plaaslike Munisipaliteit (die een wat ontplof het) staan is ook tydens die ontploffing beskadig.
Lede van die Midvaal-brandweer het vanoggend die brand onder beheer gebring. Die Emfuleni-brandweer het later ook by die toneel opgedaag.
Volgens Salome Janse van Rensburg, raadslid vir Risiville, is die omvang van die skade tans onbekend. Daar is nog nie terugvoer gegee oor hoe lank dit gaan neem om die kragtoevoer te herstel nie.
Die Midvaal Plaaslike Munisipaliteit het in ‘n verklaring gesê hulle is bewus van die kragonderbreking en dat hulle aan die probleem werk.
Volgens Midvaal word die gebied van Glen Donald, Risi-kleinhoewes en McKay Estates deur die probleem geraak.
