Mzamo Mthembu (37), ’n atleet van die Hollywoodbets-atletiekklub in Amanzimtoti, is dood nadat hy tydens die wedloop by Pinetown inmekaargesak het.

Volgens ‘n plasing op die Hollywoodbets-atletiekklub se Facebook-blad is hy na die Westville-hospitaal geneem waar hy oorlede is.

Die klub het Maandag hul medelye teenoor Mthembu se familie en vriende uitgespreek.

Phakamile Ntshiza (47), ’n atleet van die Adventist-atletiekklub in Pretoria, is oorlede nadat hy in Old Main-weg by Drummond, net voor die halfpadmerk, inmekaargesak het.

Atlete het Sondag met kardiopulmonêre resussitasie probeer om sy lewe te red, maar hy is oorlede.

Volgens Rowan James, die direkteur van die Comrades-wedloop, was Ntshiza reeds dood toe noodhulpbeamptes van Netcare op die toneel opgedaag get.

Dr. Jeremy Boulter, die Comrades-marathonvereniging se wedloopdokter, het Dinsdag (30 Augustus 2022) in ‘n verklaring gesê dat 341 atlete behandeling by die mediese fasiliteit by die eindpunt by die Moses Mabhida-stadion ontvang het.

Altesaam 221 van hierdie pasiënte is in die mediese tent behandel, terwyl 120 behandeling (wat masserings, ligte behandeling en verbande insluit) in die St. Johns-tent ontvang het.

Volgens Boulter is 82 pasiënte in die hospitaal behandel. Altesaam 28 van hulle is deur die mediese fasiliteit by die eindpunt verwys.

Boulter sê 19 pasiënte is in die hospitaal opgeneem, waarvan 7 van hulle in die intensiewe sorgeenheid opgeneem is.

Hy het Dinsdag gesê dat die paar pasiënte wat steeds in die hospitaal is, in ‘n goeie toestand is en binnekort ontslaan sal word.

Dr Boulter sê: “Die Comrades-marathon is ‘n moeilike wedloop. Die doel van ons uitgebreide mediese voorsienings is om ons toe te laat om atlete in omtrent enige mediese gebeurlikheid te help indien die behoefte ontstaan.”

Hy sê: “Die meerderheid van die hardlopers wat by die mediese fasiliteit aangekom het was ontwater en uitgeput. Hoewel dit redelik geringe simptome is, het ons mediese personeel nogtans ‘n besige dag gehad, maar alles in hul vermoë gedoen.”

Charné Bosman, wenner van 2016 se Comrades-ultramarathon, is ook gehospitaliseer nadat sy na 65km se hardloop Sondag in Pinetown inmekaargesak het.

Sy het die hospitaal geslaap.

Bykans 14 500 atlete het vanjaar gekwalifiseer om aan die moordende 90km-ultramarathon tussen Durban en Pietermaritzburg deel te neem.

Ongeveer 13 000 van die atlete het Sondag deelgeneem.

Dit is die eerste keer sedert die Covid-19 pandemie wat die wedloop weer gehou word.