VANDERBIJLPARK. – ʼn Bonte skare van alle ouderdomme en ʼn paar viervoetiges het Sondag, 17 Desember by Stonehaven on Vaal gekuier.

Vroegdag het die Kersmark oopgemaak en ʼn verskeidenheid van speelgoed en moontlike kersgeskenke is uitgestal.

Die mark was ʼn reuse sukses met heelwat uitstallers wat al teen vroegmiddag moes op pak, al hul ware was uitverkoop.

Jackie van Waveren van die Rotariër Klub van Vanderbijlpark wat die Kersmark en Kersliedere by Kerslig gereël het, het laat weet dat markte vir 23 en 30 Desember ook gehou sal word.

Naas die markte het die jongspan hulself geniet by al die somer aktiwiteite wat by die gewilde kuierplek aangebied word.

Die tafels op die groot grasperke was gepak en almal het ʼn luilekker dag geniet.

Teen laatmiddag het meer mense begin instroom ten einde sitplek te vind vir die groot Kersliedere by Kersligaand.

By die ingang het Rotariërs bondgestaan om kerse te verkoop en pamflette met die liedjies se woorde uit te deel.

Celeste Lance, voormalige president van die Rotariër Klub van Vanderbijlpark sê hul het jare laas so ʼn groot opkoms vir die tradisionele Kersliedere aand gehad.

Die fondse wat ingesamel is met donasies en kersverkope sal volgende jaar vir die Rotariër Klub van Vanderbijlpark se gemeenskapsprojekte aangewend word.