VANDERBIJLPARK. – Die vrou wat ‘n paar jaar gelede die land aan die gons gehad het toe sy die knoop met haarself deurgehaak het, het Woensdag 13 Desember vier jaar van “getroude” lewe (met haarself) by Stonehaven-on-Vaal gevier.

Rita Woodall-Terblanche (67), ‘n voormalige lotto-wenner en waarskynlik die eerste vrou in Suid-Afrika om in ‘n sologame huwelik met haarself te tree, hernu sedert haar troue op 9 November 2019 elke jaar die troubeloftes wat sy aan haarself gemaak het.

Vanjaar was sy bietjie laat om dit te doen, maar eerder laat as nooit.

Soos wat nou al die gebruik is het Rita met ballonne en linte op haar motor “Ousus” by die geleentheid opgedaag.

Nadat sy uit die motor geklim het, het sy na die rivier geloop om haar troubeloftes te hernu.

Soos wat nou al die gewoonte is, het Rita voordat sy die troubeloftes aan herself hernu het, gepraat oor die dinge wat sy op haar hart het en dit wat sy gedurende die jaar geleer het.

Vanjaar het Rita gepraat oor die onderwerp van sogenaamde people pleasing”.

Rita sê: “Ons het almal daai probleem waar ons sê ‘nee’, maar voor jy jouself kan kry het jy klaar ‘ja’ gesê.

“Dit is wat veroorsaak dat mense hul rûe op mekaar draai.

Dit is wat spanning in mense se lewens veroorsaak.

“My pa het my geleer dat alles in hierdie lewe met ‘n ‘té’ verkeerd is. Té veel, té min, té groot, té lank, té kort.

“Jy kan dit maar noem. Daar is egter net een ‘té’ wat reg is en dit is ‘te-vrede’”.

“My nuwe belofte aan myself hierdie jaar is dat ek tevrede gaan wees. As ons tevrede is dan sal ons nie so geneig wees om te ‘people please’ nie. Ons sal minder van mekaar af wegvlug as ons nie heeltyd bang is dat mense verkeerd oor ons gaan dink nie,” sê Rita.

Nadat Rita dié kort toespraak gelewer het, het sy voortgegaan om die troubeloftes te hernu.

“Hiermee belowe ek, Rita Woodall-Terblanche, dat ek myself van vooraf sal liefhê, myself na waarde sal ag, myself sal respekteer, myself sal beskerm en met alle eer my goeie naam sal beskerm.

Ek glo dat as ek werklik my hart daarop sit, dat ek tevrede sal wees met hoe my lewe verloop.”

Rita, wat gereeld onder skerp kritiek deurloop oor haar ongewone besluit om met haarself te trou, het die volgende boodskap vir kritici: “Wat ander mense van

jou dink is hulle probleem en wat jy van ander mense dink is jou probleem. Wat jy van jouself dink is al wat van belang is.”