Local newsNewsNews
Volkswagen-optog ‘n reuse sukses
VANDERBIJLPARK. - Toe Chantall Nel besluit om 'n prettige Volkwagen Kersfees-optog te reël, het sy nooit verwag dat dit soveel belangstelling sou uitlok nie.
Sy het sommer vir die pret besluit om die optog te reël, en behalwe vir die groot aantal Volkswagen motor eienaars wat aan die optog deelgeneem het, was daar ‘n nog baie groter groep wat die optog kom bekyk en ondersteun het.
Deelnemers was gevra om vanaf 18:30 in Vanderbijlpark in die parkeerarea oorkant HTS Carel de Wet/Checkers Hyper bymekaar te kom. Elkeen moes sy eie motor versier vir die optog.
Met Vaalweekblad se aankoms net voor 19:00 was die parkeerarea vol! Daar het ‘n lekker feestige atmosfeer geheers en jonk en oud het die opgemaakte motors besigtig en foto’s geneem.
Om 19:30 het die groot oomblik aangebreek vir die optog na Vereeniging en terug.
Oral langs die roete en in Vereeniging se hoofstraat het mense saamgedrom om die optog te aanskou.
En dit was beslis iets mooi om te sien. Die motors het stadig gery sodat hulle mooi bekyk kon word … en natuurlik is daar toeter gedruk waar die mense in groepe in afwagting uitgekyk het vir die motors.
“Ek was so bly om te sien hoeveel mense nog so goeie gees het. Oral was daar glimlagte. Almal het dit baie geniet en dit het my hart warm gemaak.”
“Ek wil vir almal wat aan die optog deelgeneem het baie dankie sê vir jul moeite. Dit was lekker om al die motors so opgemaak te sien en as mens veral na die kinders se gesigte gekyk het, het ek geweet dit was alles die moeite werd,” sê Chantall.
Sy beplan om dit ‘n jaarlikse instelling te maak.
Alle VW motor eienaars is welkom (van Volksies tot Golfs, enige VW maak).
Die jaar se deelnemers en all belangstellendes word gevra om Chantall te kontak by epos CHANTALLN777@GMAIL.COM met voorstelle of navrae.
* Die optogroete het Barrageweg gevolg, reguit in Vereeniging se hoofstraat (Voortrekkerstraat) in tot by Xtra Shoes en weer terug deur die hoofstraat, terug na Vanderbijlpark.
At Caxton, we employ humans to generate daily fresh news, not AI intervention. Happy reading!
