VEREENIGING. – Mirandi Mörsner se voete het nog nie grond gevat vandat sy ‘n tweede plek in Die Kontrak 3 losgesing het nie.

Haar dagboek is gelaai met optredes en onderhoude en intussen vaar haar eerste amptelike enkelsnit, As jy bid, uitstekend op verskeie radiostasies se treffersparades.

30 Desember was sy deel van Afrikaans is Groot se Groot Jol in Hartenbos en vanaand sing sy die Nuwejaar tegemoet by die Groot Jol op Stilbaai.

Nie dat alles altyd volgens plan verloop nie. Haar man, Chris wat ook haar kitaarspeler is, se kitaar is gisteroggend op ʼn vlug beskadig.

Dit nadat alles gedoen is om te verseker dat die kitaar in een stuk by die bestemming kom.

Dit het egter nie haar positiewe gesindheid en professionaliteit beïnvloed nie en het sy die verhoog by Hartenbos aan die brand gesing.

Self het sy op haar facebookblad gesê: “What a crowd en hulle het dit gelooove! Ek voel sooo bevoorreg om deel te kan hê aan Afrikaans is Groot! Een ongelooflike ongelooflike enorme produksie! Alles en almal is maar net Wow!”

Mirandi, die Vaaldriehoek is trots op jou en ons hoop ons gaan jou in die Nuwejaar verskeie kere op ons verhoë ook sien.