BENONI. – Raymond Metz (20) staan met sy broers, Shane Metz (24) en Simon Anton “Babatjie” Metz (18), en hul ma, Lindi Falch (44), tereg op die moord van  Benjamin Lotz (52) van Leeuhof in Vereeniging.

Die seuns het op die aand van 22 November 2021 in die teenwoordigheid van hul ma die oorledene in sy erf aangerand na ‘n stryery oor harde musiek vroeër die aand.

Lotz het nadat hy deur die broers aangeval is beswyk.

Hofverrigtinge is laasjaar in November tot stillstand geruk toe Raymond ‘n “epiletiese aanval” in die hofgebou gekry het.

Dit het gebeur nadat hy op Woensdag 15 November 2023 as getuie ingesweer is en besig was om getuienis in die saak te lewer.

Maandag (8 Januarie 2024) was Raymond weer terug om die res van sy getuienis te lewer, hierdie keer met die donker sonbrille.

Volgens die Metz-broers en hul ma se regsverteenwoordiger, Charles de Beer, het Raymond die brille op aanbeveling van ‘n dokter, wat hom vir sy epilepsie behandel, gedra.

Regter Carla van Veenendal het aan Raymond gesê dat hy asseblief sy regsverteenwoordiger of die tolk in kennis moet stel indien hy nie wel voel nie.

*Kry ons gedrukte koerant op Vrydag vir meer beriggewing oor dié opspraakwekkende saak.