VANDERBIJLPARK & VAALPARK. – Elke skool doen dinge anders, maar een ding is oral dieselfde, die eerste skooldag van die jaar is ʼn groot dag vir graad 1’s.

Soos die waarnemende hoof van Vaalpark Primêr, mnr Jannie Erasmus met die saalopening gesê het: “Dis jul eerste dag in hierdie saal in volle skooldrag.”

Sy graad eentjies het saam gestem. Terwyl die een Engelse klas na hul klas geloop het, het een outjie opgemerk, “I’ve got new shoes on,” waarna sy klasmaat agter hom verklaar het: “we all got new shoes on!”

Blinkswart skoene. Hemde en rokkies nog kraakvars. Skoolkleurlinte in die hare.

By Laerskool Emfulenipark het die jongelinge sommer al vroeg hul sit in die klasse gekry en aan die werk gespring.

Ok, hulle het ingekleur, maar in die skool is alles mos werk. Diep was die konsentrasie.

Groot die ontsteltenis toe hierdie joernalis opmerk, “dis ʼn baie mooi koei,” en die antwoord “tannie, dis ʼn unicorn!” Wel, dit was ʼn baie kleurvolle prentjie.

Jongman Franco Barnard het summier vir die tannie met die kamera gedemonstreer hoe sy fleksi-liniaal alkante toe kan buig sonder om te breek.

Wat tot die gevolg gehad het, dat sy tafelmaat Cameron Corbette dadelik sy liniaal sommer in ʼn sirkel gevou het.

Joernalis is met spoed daaruit, terwyl juffrou mooi moes verduidelik dat nie alle liniale so kan buig nie en dat liniale liefs gebruik moet word om reguitlyne te trek wanneer juffrou so sê.

Laerskool Koillegepark se graad 1’s het al van 07:00 by die kanthekkie ingestroom. Die meeste was heel gerus en baie opgewonde.

Hulle het die vorige dag al met hul juffrouens kennis gemaak as ook die hoofseun, hoofdogter en hul twee gesante.

Maar, toe was almal soos ruimtevaarders aangetrek en die voornemende graad 1’s het nog hul gewone drag aangehad.

Is darem baie anders as dieselfde “groot kinders” jou skielik by die hek inwag in hul netjiese skooluniform met die imposante baadjies en al die balkies.

Om darem dan by daardie paadjie af te stap en ʼn daisy-raam by die hoofseun te vat en daardeur te loer om afgeneem te word, is nie so maklik nie.

Dan moes hul boonop nog ʼn klok ook lui. Party het opgewonde meegedoen, ander was bietjie sku vir die klok en een outjie het dramaties sy oë gerol vir die aktiwiteit.

Tussen die drie skole, was daar min trane onder die kinders, maar groot manne het maar swaar gesluk toe hul van daardie klaskamers weggestap het.