VANDERBIJLPARK. – ‘n Hoofstroomskool se leerders kry nie aldag die geleentheid om vriende te maak met ‘n skool vir leerlinge met erge verstandelike en liggaamlike gestremdhede nie.

Vrydag, 8 Maart het Laerskool Kollegepark en Eurekaskool die gaping oorbrug toe ‘n groep Eurekaleerders Kollegepark besoek het.

Die Parkies se graad 4 – 7’s het bankvas op die pawiljoen gesit en hul span dirigente het gesorg dat die gees hoog bly.

Op die veld het Eureka se serebraal gestremdes opgewonde gewag om bekendgestel te word en aan ‘n paar naellope deel te neem. Of dan rystoel-lope.

Die graad 7 Parkies het ingespring en gehelp rolstoele stoot en dit was omtrent ‘n kompetisie onder hulle om te kyk wie kry die geleentheid om die Eureka leerders te help.

Tot groot opwinding en aanmoediging van die pawiljoen se kant af, het van die Parkies ook hul slag in die rolstoelresies probeer.

Net om uit te vind dis glad nie maklik om ‘n rolstoel in beweging oor dik gras te hou nie.

Die Eureka leerders het keer op keer gewen, met ywerige Parkies wat hul rolstoele gestoot het.

Die skare het omtrent gejuig toe van die onderwysers ook die rolstoelwedren aangedurf het.

Na afloop van die kort atletiekprogram het die Parkies spesiaal vir die Eureka leerders ‘n kreet, “Die Blou kom,” gedoen voordat almal reggestaan het vir ‘n foto.

Mev. Yolandie Engels van Kollegepark sê Eurekaskool het hul genader om die dag aan te bied om bewusmaking van serebraal gestremdheid te bevorder.

“Dit was die eerste keer wat ons so iets gedoen het en dit was ‘n groot sukses,” het sy met ‘n glimlag verklaar terwyl die Parkies steeds op die pawiljoen gesing en gedans het.