VANDERBIJLPARK – Kunstedraai se Afrikaans is 100 Feesweek het goed afgeloop. Deur die loop van die week het verskeie skole en dansskole hul draai op Kunstedraai se verhoog gemaak, elke keer voor ‘n volgepakte saal.

Daar is op Afrikaanse liedjies ballet gedoen en almal het hul bydrae gelewer, van die beginners tot by die meer gevorderde ballerinas.

Die dramagroepe het ook nie teruggestaan nie en hul beste gegee, alles in Afrikaans. Die Vrydagaand was die Akademie vir Dramakuns se juniors en seniors aan die beurt om hul komedies op te voer.

Daar is ook ‘n komedie deur Hoërskool Driehoek opgevoer en On Pointe Dansskool het ‘n paar roerende danse gedoen.

Alles het nie heeltyd seepglad verloop nie, soos toe die oermens wat die wiel ontdek het op ‘n stadium die wiel (gelukkig uit karton gesny) verloor en dit op die joernalis in die voorste ry se voete beland het.

Alles is met oorgawe gedoen en al die akteurs en dansers het harte gesteel.