Duisende huishoudings word hierdeur geraak.

Om te sê inwoners is omgekrap en gatvol is waarskynlik nie die regte woorde om gemoedere te beskryf nie. Die inwoners het hierdie maand net een week elektrisiteit gehad.

Inwoners is boosaardig kwaad en glo nou niks meer nie. En dit is met goeie reg, want almal is platsak soos wat daar ekstra moeite gedoen moet word, en geld bestee word, om kop bo water te hou.

“Drop the excuses and do your job!! The time for action has come,” het een inwoner op ELM se Facebook gedreig. Dit was maar net een van die minder aanvallende boodskappe wat oral op sosiale media is.

Wat dinge erger maak is dat daar geen deursigtigheid en behoorlike kommunikasie met inwoners is oor die vordering met die probleem nie.

Raadslid Gerda Senekal is probeer egter haar bes om die publiek op hoogte te hou.

Sy was gister weer op die toneel by die Town Substasie te sien. Aan haar lyftaal was dit egter gou duidelik dat daar geen hoop was dat inwoners reeds gisteraand weer krag sou hê nie.

Senekal, wat die gemeenskap wil help, was gister boonop twee keer by die substasie gyselaar gehou.

Dit wil voorkom of inwoners nou hul woede op enigeen begin uithaal.

Senekal het die nuus gedeel dat die nuwe breaker wat geinstalleer is gas lek. Die probleem sal vandag aandag geniet, maar of dit vandag opgelos sal word is steeds ‘n ope vraag.