VANDERBIJLPARK – Clinton Samons en sy gesin kan uiteindelik bietjie ontspan na maande se intensiewe oefening en gedissiplineerde eet ter voorbereiding vir sy eerste professionele liggaamsbou kompetisie.
Die IBFF Worldwide Pro Show het 6 Desember by die Midrand Konferensiesentrum plaasgevind. Professionele liggaamsbouers van regoor Suid-Afrika het deelgeneem.
Daar was nege deelnemers in Clinton se afdeling, en al het die senuwees bietjie gekou, het hy ‘n goeie vierde plek behaal.
Hy het die verhoog gedeel met groot name in die bedryf soos JJ Brits en Murrey Laney en beskou dit as ‘n absolute voorreg.
Clinton is dankbaar hy kon aanhou en uithou om aan die kompetisie deel te neem. Daarvoor gee hy alle eer aan God, maar spreek ook sy dankbaarheid uit teenoor sy vrou, kinders en uitgebreide familie wat daar was om hom te ondersteun.
Sy vrou Charnay, het al sy ondersteuners se gevoelens mooi vasgevat op Facebook vlak voor die begin van die kompetisie:
“Sterkte my lief. Maak nie saak wat gebeur nie, ons staan vas agter jou. En ek voel ek kan vandag sê, wow, we made it.”
