VANDERBIJLPARK – Prefekte van Laerskool Emfulenipark het onlangs ’n praktiese leierskapsontwikkelingsprogram voltooi, aangebied deur Nicolene van Rooyen, dosent aan die Noordwes-Universiteit se Vaalkampus.

Die Build Leadership Programme is vanjaar vir die eerste keer aangebied en bestaan uit vyf werkswinkels met temas soos kritiese denke, emosionele intelligensie, konflikhantering, doelwitstelling en selfvertroue.

Die doel was om jong leiers toe te rus met regte vaardighede – nie net ekstra take nie.

“Prefekte help gewoonlik net met skooltake, maar word selde geleer hoe om leiers te wees,” sê Van Rooyen. “Hierdie program gee hulle die gereedskap om dinamiese, verantwoordelike leiers te word.”

Die program is ondersteun deur prof. Kirsty-Lee Sharp, prof. Danelle Fourie en ander lede van die NWU se Fakulteit Ekonomiese- en Bestuurswetenskappe.

’n Sertifikaatseremonie is op 3 September gehou.

Tydens die geleentheid is ouers en onderwysers gewys watter vaardighede die leerders aangeleer het.

Een van die deelnemers was Van Rooyen se dogter, Miné van Rooyen.

Die program het ’n duidelike boodskap aan die jong leiers gelos: “As jou dade ander inspireer om meer te droom, meer te leer, meer te doen en meer te wees – dan is jy ’n leier.”

Van Rooyen sê hulle hoop om die projek ook na Hoërskole uit te brei.