VEREENIGING – Die DA sê die Emfuleni Plaaslike Munisipaliteit het R2 miljoen op plastiese vullissakke spandeer, terwyl die munisipale vullisverwydering steeds stelselmatig faal en die sakke nie gebruik word nie.

Kingsol Chabalala, DA-lid van die Gautengse wetgewer en die party se burgemeesterskandidaat in Emfuleni, sê dié inligting het aan die lig gekom ná vrae aan die provinsiale wetgewer oor die besteding van die geld.

Die munisipaliteit het die aankoop van die sakke bevestig, wat die DA laat twyfel oor die motiewe van die munisipaliteit.

Volgens Chabalala weerspieël die R2 miljoen wat aan vullissakke bestee is ’n duidelike diskonneksie met die werklike behoeftes van inwoners.

Die DA sê dit laat lyk of politieke leiers dalk self voordeel trek en dui op moontlike korrupsie.

Die party sê hulle sal aanhou om druk in die Gautengse wetgewer uit te oefen en op antwoorde aan ted dring, ten einde goeie en deursigtige bestuur namens inwoners van Emfuleni te bevorder.