VANDERBIJLPARK – Ondanks voortgesette uitdagings wat verliese en moeilike markomstandighede insluit, meen ArcelorMittal Suid-Afrika sy herstelproses begin momentum kry.

In kommentaar op die nuutste resultate het die hoofuitvoerende beampte, Kobus Verster, gesê hoewel markomstandighede buitengewoon moeilik bly, is die staalreus aansienlik sterker as wat dit 18 maande gelede was.

Hy het gesê die moeilike besluite wat hulle geneem het, begin meetbare verbeterings in hul onderliggende prestasie lewer.

Hy het bygevoeg dat hul prioriteit steeds is om die ommeswaai te voltooi, volhoubare winsgewendheid te herstel en ArcelorMittal Suid-Afrika te posisioneer vir langtermynsukses.

Halfjaarresultate

Die staalvervaardiger het sy halfjaarresultate vir die ses maande tot Junie bekendgemaak en gesê swak plaaslike aanvraag, invoere en wêreldwye oorvoorsiening plaas steeds druk op die onderneming.

Inkomste het met 30% geval, terwyl die maatskappy ‘n EBITDA-verlies van R409 miljoen en ‘n wesentlike verlies (hooflynverlies) van R1,49 miljard aangeteken het.

Netto lenings het tot R7,9 miljard gestyg.

ArcelorMittal sê egter sy onderliggende prestasie verbeter.

Vaste koste is met ses persent verminder, terwyl operasionele veranderinge, verkrygingsbesparings en verbeterde betroubaarheid resultate begin lewer.

Die maatskappy sê ook sy kwartaallikse EBITDA-posisie het verbeter van ‘n verlies van R1,1 miljard verlede jaar tot amper gelykbreek in die tweede kwartaal van 2026.