VANDERBIJLPARK – ’n Sogenaamde “honey sucker” – ’n vakuumtenkwa wat riool en ander vloeibare afval opsuig en vervoer – het vermoedelik te ver agteruitgery en in die water by die Rietspruitbrug tussen Vanderbijlpark en Potchefstroom beland.

Verskeie bekommerde lesers het Vaalweekblad oor die voorval genader.

Dorette Meiring, wat foto’s van die voertuig geneem het, sê inwoners stroomaf van die Vaaldam is bekommerd oor moontlike besoedeling van die Vaalrivier.

“Ons woon onder die Barrage en al hierdie vullis besoedel ons rivier op ’n weeklikse basis,” het sy gesê.

Die foto’s is volgens Meiring Woensdag geneem.

Vaalweekblad probeer vasstel aan wie die voertuig behoort, hoe dit in die rivier beland het en of enige afval in die water gestort het.