Dokkies se o14’s troef Overvaal
Die skole krieketseisoen is in volle swang en die onderskeie spanne laat hul teenstanders goed les opsê.
MEYERTON – Hoërskool Dr. Malan en Hoërskool Overvaal se o14-krieketspanne het in die week kragte gemeet.
Overvaal het eerste gekolf en was 84/9 na 20 boulbeurte. Dokkies se Beon Marais het drie paaltjies geneem en slegs 17 lopies afgestaan, terwyl Kelvin Masters vier paaltjies vir 16 lopies laat kantel het.
Dr. Malan het in hul beurt die telling vinnig nagejaag en die verlangde lopies binne 6.1 boulbeurte bereik met net twee paaltjies plat. Beon Marais het ʼn skitterende 71* van 24 balle geslaan.
Dokkies wen die wedstryd met 8 paaltjies. Dr. Malan het hul o14’s op hul Facebookblad geprys en gesê: “Ons is ONGELOOFLIK trots op ons o14-krieketspan met hulle PUIK oorwinning teen Overvaal! Julle het gewys wat spanwerk, deursettingsvermoë en Dokkie-trots beteken.”
