ERMELO – Sias Jacobs, ’n gr. 12-leerder van Ligbron Akademie vir Tegnologie, is onlangs tydens die 2022 AVS Bokkieweek vir die Suid-Afrikaanse Rugbybokkiespan verkies.

Hy het ook tydens die week ’n beurs om by die Internasionale Rugbyinstituut in Pretoria te gaan leer en speel, gewen.

Volgens sy ma, Charlene, het hy van kleins af ’n groot liefde vir sport gehad.

Hy het sy laerskoolloopbaan by Ermelo Laerskool afgeskop, waarna hy in gr. 4 na Laerskool JJ van der Merwe geskuif is.

“Vandat hy skool begin het, het hy altyd vir die groter rugby- en krieketspanne gespeel, en het hy ook in die jaar toe hy 10 geword het, in gewigstoot begin presteer,” het sy ma gesê.

In 2015 is Sias vir die Mpumalanga-krieketspan verkies, en die jaar daarna het hy die Titans A-krieketspan gehaal.

Na afloop van die toernooi in die Kaap, was Sias derde op die lys van die top kolwers in die land. In dieselfde jaar het hy gedurende die Suid-Afrikaanse Atletiekbyeekoms in gewigstoot en skyfwerp uitgeblink.

Sias is in 2016 as die sportseun van die jaar by Laerskool JJ van der Merwe aangewys.

Kort nadat hy by Ligbron Akademie vir Tegnologie aangesluit het, het hy elke kans aangegryp om aan alle sportsoorte moontlik deel te neem.

Lees die volledige berig in die Hoëvelder.