MBOMBELA – Laerskool Bergland se toppresteerders het hierdie jaar met hul gawes en talente behoorlik gewoeker, en erkenning vir al hul uitsonderlike prestasies by vanjaar se senior toekenningsaand verkry. Die aangeleentheid het op 26 November in Laerskool Bergland se skoolsaal plaasgevind.
Vanjaar se hoofseun, Paul-Hendri van der Merwe is as duxleerder aangewys nadat hy op sport-, kultuur- en akademiese vlak uitgeblink het. Verder het hy ook uitstaande leierskap deur die loop van die jaar getoon en sy pligte as hoofseun uitstekend nagekom.
Paul-Hendri het ook die gesogte
Danie Snyman Wisseltrofee vir wiskunde en wetenskap ontvang om sy aand op ‘n hoogtepunt af te sluit.
Christo Nel is as senior sportseun van die jaar aangewys en het bewys dat daar nog ‘n blink toekoms op die sportvelde vir dié Bergie voorlê. Kyla Labuschagne is ook vir haar prestasie op die sportvelde vereer en het die toekenning vir beste senior sportdogter ontvang.
Kobie Theron het ook ‘n uitstekende jaar beleef en is as Bergland se mees voortreflike leerder aangewys. Danté van der Westhuizen het die senior kultuurtrofee gewen.
Jayden Joubert en Mila de Villiers sal Bergland se naam in 2015 hooghou nadat hulle onderskeidelik as hoofseun en hoofdogter verkies is.
