Uitgedos in nuwe skoolklere met lekkernye in hul tasse, kon Laerskool Numbi se haasbekkies nie wag om by hul nuwe klas in te stap nie.
Sommige leerders se tasse was selfs groter as hulself en ander se skoolskoene het behoorlik van nuutheid gekraak. Die leerders is hartlik deur hul onderskeie onderwysers verwelkom met ‘n suiglekker en ‘n prentjie om in te kleur.
Gedurende saalperiode het hulle tjoepstil gesit en aandagtig na die voorlesing van die reëls deur die skoolhoof, mnr. André Coetzee, geluister.
Die jaar was die nuwelinge vreeslik dapper en het daar geen trane gevloei nie, maar sommige ouers het egter nie so dapper gelyk nie. Alhoewel die kinders se eerste skooldag baie onsekerhede ingehou het, het hulle baie vinnig aangepas en hope pret gehad.
