Diereliefhebbers maak hul harte oop

MBOMBELA – Pro-Life Pet Recue is die afgelope paar maande oorweldig deur die Laevelders se goedhartigheid.

Volgens Monty Pienaar van dié veilige hawe vir diere is hulle verstom oor hoe die mense hulle harte oopmaak wanneer hulle in nood verkeer. “Jy kan maar kyk, sodra ons iets op Facebook plaas, is dit een, twee, drie en dan is hulle hier,” het hy opgewonde gesê.

Hy meen dis gebare soos hierdie wat maak dat hulle hierdie diens kan lewer.

“Dit is ongelooflik om te weet daar is mense wat dieselfde oor diere voel as ons. Hulle bring van hondekos tot handearbeid vir die bou van nuwe kampe. Dit is abosoluut wonderlik en sonder sulke mense sal ons nie ons deure kan oophou nie.”