Gestewel en gestrik vier vroue uniekheid

Chirpy Baba- en Kleutersentrum het die afgelope Saterdagoggend ‘n uiters suksesvolle en geseënde damesoggend by die Barnyard gehou.

Van die kleuters se ma’s, oumas en dié se vriendinne het hul stewels en strikke, soos die tema voorgeskryf het, nadergetrek en na Timothy Kieswetter kom luister.

Dié bekende seksioloog het op ‘n humoristiese wyse sy sienings rondom supervroue gedeel, wat sommer vir ekstra oefening vir die vroue se lag- en maagspiere gesorg het.

Die kern van sy boodskap was egter dat elke vrou uniek deur God geskape is en haar identiteit dus nie moet afhang van haar man, wat dalk nie haar emosionele behoeftes vervul nie.

Linda Roets, die hoof van die sentrum, het ook haar uitstekende span bedank vir hul harde werk om dié fondsinsamelingsprojek moontlik te maak, asook elkeen wat die funksie ondersteun en só verder tot die sukses daarvan bygedra het.

Volgens haar was die bydraes van Friends Café, Sundowners @ Montana, Belle Beautique, Hairlovers, Je Ne Suis Quoi en Annerien Joubert ook onontbeerlik.

Kieswetter bied ook op 20 Julie ‘n damesaand by die Barnyard aan. Dié keer is die onderwerp “Koeke en Terte” en kaartjies teen R150 sal weer by Chirpy Baba- en Kleutersentrum beskikbaar wees.