Laerskool Nelspruit het onlangs sy merietetoekenningsaande gehou.

Op 3 Desember is gr. 1 tot 4 se toekennings aangebied, en op 4 Desember was dit gr. 5 tot 7 se beurt. 2024 se duxleerder is Mignon Basson. Dié leerder word in gr. 7 bepaal deur sy of haar hoogste gemiddelde vanaf gr. 5 tot 7 uit te werk. Mignon se gemiddeld was die hoogste die afgelope drie jaar.

Die juniorkultuurleerder van die jaar is Heidie du Toit, en Heinrich Hofmeyr is die seniorkultuurleerder van die jaar. Elané Janse van Rensburg het die hoof se toekenning vir 2024 ontvang, met komplimente van die skoolhoof, Jaco Hauptfleisch.

Die skool se veelsydigste atleet vir 2024 is Jessica Badenhorst. Dandré Louw is as die sportseun van die jaar aangewys en Kiara Grobler die sportdogter van die jaar.