Die afsterwe van Luna Grant van Mbombela word wyd in die Laeveld betreur.

Luna sal onthou word vir haar vriendelike geaardheid, bereidwilligheid om te help en haar kenmerkende breë glimlag waarmee sy kliënte by haar ateljee verwelkom het.

Met haar kreatiwiteit en vakmanskap het sy talle unieke produkte geskep, van borduurwerk en alterasies tot handgemaakte geskenke vir elke geleentheid.

By Laevelder sal sy veral onthou word vir die besonderse kledingstuk met ’n koerantpapiermotief wat sy vir Innibos 2025 vervaardig het.

Die kledingstuk, wat tot in die fynste detail afgewerk is, het haar talent en oog vir detail treffend weerspieël.

Intussen stroom huldeblyke van vriende, kliënte en gemeenskapslede op sosiale media in.

“Ai, dis so hartseer. Dis nog só onwerklik. RIV Luna,’ het Ben en Susan Andjelkovic geskryf.

“My liewe, liewe Luna, ons gaan jou mis, meer as wat woorde ooit kan beskryf. Jy was een van die engele wat ons die voorreg gehad het om ‘n vriend te noem. Aan Malcolm en al jou geliefdes – ons dink aan julle,” het Lanie Pieterse gesê.

“So jammer. Ons gaan jou mis, Luna. Ons het altyd so lekker gesels. Sterkte aan die familie,” het Meisie Pieterse geskryf.

“Rus in vrede, Tannie Luna. Jy laat ‘n groot leemte in die Laeveld, veral in Nelspruit. Tannie sal gemis word. Malcolm en die familie, mag God julle die krag gee wat julle nodig het om deur hierdie moeilike tyd te kom,” het Christie Botha gepos.

Begrafnisreëlings sal op ’n later stadium bekend gemaak word.