Lede van die Mpumalanga Laeveld Sport en Jag Federasie het onlangs hul staal by die SA Sport en Jag Kampioenskappe gewys waar die Laeveld met nie minder nie as 25 medaljes bekroon is.

Vanjaar se SA Sport en Jag Kampioenskappe is deur die Laeveld-unie by Dusty Ranch in Barberton aangebied, en 138 skuts het van regoor die land gereis om deel te neem. Sewe van die agt unies wat onder die SA Sport en Jag Federasie val, was teenwoordig by vanjaar se SA’s – dit was slegs die SWD-unie wat dit nie bygewoon het nie.

Kompetisie het oor drie dae, vanaf 7 tot 9 Augustus, plaasgevind en die skuts het glad nie teleurgestel nie. Elke deelnemer het bewys waarom hierdie groep as van die land se beste skuts beskou word. Van die eerste skoot af was die stryd fel en elke medaljeplek is duur verower.

Die Laeveld-skuts was tydens die hele kompetisie konstant onder die top drie. Stephanie van der Merwe was die mees suksesvolle verteenwoordiger: in die senior vrouekategorie het sy silwer in spring rifle verower, asook goud in compact handgun en standard handgun.

Met nege goud, nege silwer en sewe brons medaljes, het die Laevelders by vanjaar se SA’s behoorlik die spiere gebult – ‘n uitsonderlike prestasie op tuisgrond.