Komatipoort Akademie se swemmers is vanjaar aan die brand, en twee van hul leerders het onlangs in Mosambiek bewys hoe helder hul sterre skyn.

Danika Steyn en Xander Koedyk was die duo wat verlede maand hul reis oor die grens gemaak het om in internasionale waters te gaan swem. Die twee puik swemmers het die naweek van 18 Oktober hul staal gewys in die Zimpeto 50m Olimpiese swembad in Maputo.

Hulle was deel van die Mpumalanga swemspan wat teen 10 Mosambiekse swemklubs deelgeneem het. Die dogterspan van Mpumalanga het boaan die punteleer geëindig, en die seunsspan tweede. Beide Danika en Xander het hul goed van hul taak gekwyt, vir almal gewys hoe sterk Komati se swemmers is, en hulle is met ‘n handvol medaljes terug huis toe.

“Wel gedaan, julle twee! Komatipoort Akademie is baie trots op julle,” het die skool gesê.