Kabels gesteel en Rovos Rail trein paar uur hier gestrand
Een van Rovos Rail se luukse vloot treine is vir 'n paar ure by die Middelburg Stasie gestrand, omdat kabels gesteel is in die omgewing van die Olifantsrivier.
Mnr. Adam Bentley, wat aan die stuur staan van die Rovos Rail se span op die trein staan, sê hulle het gister gaste in Kaapmuiden afgelaai.
Op pad terug na hul privaat stasie in Pretoria, is hulle vanoggend in die vroeë oggendure laat weet dat hulle by die Middelburg Stasie moet stop.
Hulle het om 04:15 by die stasie ingetrek en wag hulle sedertdien om te hoor wanneer die kabels herstel sal wees.
Die Rovos Rail se 21 personeellede het ontbyt by die Middelburg Stasie geëet, terwyl daar gewag is vir nuus van die herstelwerk van die kabels.
Mnr. Bentley het gemeld dat daar aanvanklik gehoop is dat die kabels teen 12:00 vandag reg sou wees.
‘n Bussie van die Rovos Rail het egter omstreeks 12:00 opgedaag om die personeel solank Pretoria toe te neem.
Mnr. Bentley het genoem dat hy en die drywer by die trein sal bly en as die kabels reg is, sal hy en die drywer dan teruggaan met die trein.
- Rovos Rail gebruik Transnet se drywers en lokomotiewe.
