Vrou wil weer vir kinders in Noord-Kaap geskenke bymekaar maak
Die Middelburger wat deur die jaar geskenke vir arm kinders in die Noord-Kaap bymekaar gemaak het, het dit alles onlangs vir die Middelburg SAVF Maatskaplike Dienste geskenk.
Die SAVF Maatskaplike dienste het die groot hoop geskenke saam met ons dorp se skoonhede, Naomi Steenkamp en Amy Gwebu, vir minderbevoorregte kinders tydens ‘n spesiale Kerspartytjie by die Izak Badenhorstsaal uitgedeel.
Haar man, Willie, het op daardie stadium in Alexanderbaai gewerk.
Tydens een van haar kuiers by hom, het sy gesien hoe baie arm kinders daar is en het sy lekkergoedpakkies vir die kinders uitgedeel.
Sy het egter besluit om vir hulle hierdie Kersfees spesiaal te maak en het begin geskenke bymekaarmaak.
Teen laat hierdie jaar het sy al ‘n vrag geskenke bymekaar gehad, maar het haar man skielik sy werk in die Noord-Kaap verloor.
Haar planne om die geskenke af te vat soontoe is net daar in die wiele gery.
Me. Oosthuizen het egter besluit om steeds kinderharte bly te maak en het die geskenke vir SAVF Maatskaplike Dienste geskenk. Sy het ook die Kerspartytjie bygewoon.
Kort na die partytjie, het hulle die goeie nuus gekry dat haar man weer werk gekry het.
“My hart gaan steeds uit na daardie kinders wat nie speelgoed het nie en sommer met skulpies op die strand speel. Januarie gaan ek weer begin om geskenke vir hulle bymekaar te maak. Volgende jaar kry hulle hulle spesiale Kersfees! Ons gaan afry soontoe en hulle bederf.”
Sy gaan van voor af geskenke bymekaar maak vir seuns en dogters vanaf baba tot 13 jarige ouderdom.
Van klere en skoene tot badkamerbenodigdhede (waslappies, sepies, tandeborsels), DVD’s met kinderverhale, speelgoed, juwele en gesigroompies vir tienerdogters en skryfbehoeftes, kan geskenk word.
Soretha sê mense is welkom om hul eie geskenkpakkies op te maak en toe te draai. Hulle moet net op die pakkie ’n plakker sit om te sê vir watter ouderdom kind en of dit vir ’n seun of dogter is.
Netjiese tweedehandse artikels is ook welkom.
Omdat sy self die geskenke moet toedraai, kan mense geskenkpapier en kleefband skenk, as hulle op dié manier betrokke wil raak. Hulle gaan nie kontant hanteer nie.
As mense onseker is wat om te skenk, kan hulle haar bel en sy sal vir hulle sê wat benodig word.
• Persone wat betrokke wil raak, kan haar bel by 072 272 5337.
