Twee beseer in Vaalfonteinpad-ongeluk
Twee persone het geringe beserings opgedoen in 'n ongeluk op die Vaalfonteinpad, 15km buite Groblersdal.
’n Toyota Land Cruiser en ’n Volkswagen Fox Caddy bakkie was vanoggend (Vrydag) omstreeks 05:50 in ‘n ongeluk betrokke op die Vaalfonteinpad, 15km buite Groblersdal.
Volgens Derrick Maidment, 24 Seven Logistics, is die pad baie nat en donker gewees. “Die oorsaak van die ongeluk is egter onbekend, maar volgens inligting van ooggetuies het die Toyota bakkie agter in die Volkswagen bakkie vassgery, waarna die Volkswagen bakkie se bestuurder beheer verloor het oor die voertuig,” sê Maidment.
Die Volkswagen bakkie het gerol en langs die pad tot stilstand gekom.
Twee insittendes van die bakkie het geringe beserings opgedoen, waarna hul na Groblersdal Hospitaal vervoer is vir mediese behandeling.
Die insittendes van die Toyota is nie in die ongeluk beseer nie.
Maidment maan motoriste om versigtig te ry op die nat paaie en sê dat daar nog baie reën voorspel word.
