Insekte steel die kollig by CVO Marmer
’n Opwindende insekte-aanbieding het CVO Marmer-leerders nuwe feite oor bestuiwing en ekosisteme geleer.
Eco Pilots South Africa het ’n opvoedkundige sessie oor insekte aangebied vir die leerlinge by CVO Marmer.
Tydens die instappie het leerders meer geleer oor die belangrike rol wat insekte in die omgewing speel. Van hoe insekte leef tot hoe hulle help om die natuurlike balans in die ekosisteem te handhaaf, is geleer.
Die interaktiewe aanbieding het aan leerders die geleentheid gebied om nuwe feite te ontdek en op ’n praktiese manier meer te leer. Insekte speel ’n sleutelrol in prosesse soos bestuiwing en die afbreek van organiese materiaal, wat noodsaaklik is vir ’n gesonde natuur.
Volgens die skool was die besoek nie net opvoedkundig nie, maar ook baie pret, en het dit leerders weer laat besef hoe wonderlik en kompleks die natuur is.
Die dag het ’n blywende indruk op die leerders gemaak en hulle met ’n groter waardering vir die klein wonders van die skepping gelaat.
