’n Vrou wat daarvan aangekla word dat sy na bewering honderde duisende rand van Emfuleni-munisipaliteit se inwoners geneem het om hul rekeninge teen afslag te vereffen, wil weer om borgtog aansoek doen, berig Vaalweekblad.

Janitha van Reenen (25) staan tereg op aanklagte van bedrog wat verband hou met geld wat na bewering wederregtelik van die munisipaliteit en inwoners verkry is.

Sy word daarvan beskuldig dat sy haar as ’n onafhanklike agent voorgedoen het en inwoners glo mislei het om geld te betaal vir afslag op hul munisipale rekeninge.

Volgens die staat is die geld na bewering nooit aan die munisipaliteit of die beoogde rekeninge oorgedra nie.

Daar word ook beweer dat sy vals eise by die munisipaliteit ingedien het, wat tot uitbetalings van tussen R400 000 en R500 000 gelei het.

Van Reenen is vroeër borgtog geweier omdat sy as ’n vlugrisiko beskou is en daar kommer bestaan het dat sy moontlik met getuies kon inmeng.

Die staat het toe aangevoer dat haar vrylating nie in die belang van geregtigheid sou wees nie.

Die saak word Maandag (29 Junie) in die hof hervat wanneer die nuwe borgaansoek aangehoor sal word.

Breaking news at your fingertips… Follow Caxton Network News on Facebook and join our WhatsApp channel.

Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.