Die 77-jarige Danie Odendaal, die veelbekroonde vervaardiger van gewilde sepies soos 7de Laan en Egoli: Plek van goud, is oorlede.

Volgens berigte is Odendaal gisteraand in Langebaan dood, maar die oorsaak van sy dood is nie bekend nie.

Odendaal het in 2019 in Frankryk in ‘n hospitaal aangesterk nadat hy ‘n beroerte gekry het.

Hy en sy vrou Annie Basson besit ‘n huis in Frankryk.

Basson is bekend om haar werk agter die skerms by 7de Laan en is onder meer vervaardiger van die minireeks Daisy (oor die gifmoordenaar Daisy de Melkder) en die enkeldrama Uitdraai.

Odendaal se kollega, Henry Mylne, het in ‘n Facebook-plasing gedeel: “Om saam met Danie aan Egoli en 7de Laan te kon werk was om Charles Dickens aan te haal: ‘The best of times!’ Om Danie se vriend en kollega te wees ‘was the ultimate of times!'”

Deànré Reiners, wie die rol van Shawn Basson in 7de Laan vertolk het, het aan Caxton Local Media gesê Odendaal was ‘’n reus was in ons bedryf’.

“In die tyd wat ek by 7de Laan betrokke was, was Danie al rustig afgetree. Maar sy teenwoordigheid was tasbaar in elke studio. En as jy onseker was, het jy bloot gevra ‘wat sou Oom Daan doen’.

“Die bedryf treur die verlies van ’n ikoon wat lewe in van die gewildste stories op die kassie geblaas het. Hy het soveel lewens geraak met stories wat saak maak.”

Reiners sê die rimpeleffek wat Odendaal se lewe gehad het op die vermaaklikheidsbedryf is onmeetbaar.

“Wees gegroet.”

* Hierdie berig is aangepas vandat dit aanvanklik gepubliseer is.