Die liggame van Hendrik (77) en Anneke Claassen (75) is gister omstreeks 15:00 gevind nadat hulle wreed aangeval is by die hotel by die Eggo-grotte in Ohrigstad.

Werknemers het om hulp geroep nadat hulle volgens Piet Claassen, Hendrik se broer van Middelburg, op die egpaar se liggame afgekom het.

Volgens Piet weet die familie nog nie hoe die egpaar vermoor is nie.

Daar is glo net aan hulle vertel dat werknemers van die Eggo-grotte, wat aan die paartjie behoort het, wreed gemartel is.

“Ons hoor die hele plek was rooi van die bloed, daar was geen genade nie.”

Volgens Piet vermoed die familie dat die moordenaars agter geld aan was, weens die winsgewende bedryf.

Steelburger/ Lydenburg News berig dat niemand tot dusver in hegtenis geneem is in verband met die voorval nie.

“Die polisie veroordeel hierdie wreedaardige en sinnelose aanval en moord. Ons doen ‘n beroep op enigeen met inligting oor die voorval om die polisie te kontak,” se Luitenant-generaal Thembi Hadebe, polisiekommissaris in Limpopo.