Update

Ermelo-verkragtingsaak: 2 mans steeds in aanhouding ná derde hofverskyning

Die onttrekking van die voorsittende landdros en herhaalde uitstelle het die verloop van ’n sensitiewe saak in ’n Mpumalanga-hof onder die vergrootglas geplaas.

Die twee mans wat saam met ’n vrou in verband met die beweerde verkragting van ’n minderjarige in hegtenis geneem is, bly in aanhouding nadat die saak vroeër vandag (16 November), weer in die Ermelo-landdroshof voorgekom het.

Die saak is uitgestel om reëlings te tref vir ’n landdros en aanklaer van buite die Ermelo-gebied om die verrigtinge voort te sit.

Die hof is meegedeel dat die partye gereed is om met die borgtogaansoek voort te gaan. Die saak is egter tot Maandag (23 November), uitgestel, berig die Highvelder News.

Die twee mans is teruggestuur na aanhouding, terwyl die vrou op haar bestaande borgtog vry bly.

Die mans is sedert hul inhegtenisneming op 6 November in aanhouding.

Landdros onttrek hom aan die saak

Die jongste verwikkeling volg op verlede week se onverwagse besluit deur die voorsittende landdros om hom op Woensdag (11 November) in die belang van geregtigheid aan die saak te onttrek.

Soos vroeër berig, het die landdros verwys na die aansienlike plaaslike aandag en belangstelling wat die saak ontlok het.

Hy het aangedui dat ’n landdros van buite die Ermelo-jurisdiksie die saak verder moet aanhoor.

Die verdediging het tydens dié hofverskyning navraag gedoen oor hoe lank dit sou neem om die nodige reëlings af te handel en voorgestel dat die saak tot Vrydag (13 November) uitgestel.

Die landdros het egter verduidelik dat sy beskikbaarheid op kantoor nie noodwendig sou beteken dat al die reëlings teen daardie datum afgehandel sou wees nie.

Beskuldigdes sedert 6 November agter tralies

Die drie volwassenes, twee mans en ’n vrou, is aanvanklik op 6 November in hegtenis geneem. Hulle het op 9 November vir die eerste keer in die Ermelo-landdroshof verskyn.

Die vrou is tydens dié verskyning op borgtog vrygelaat, terwyl die twee mans in aanhouding gebly het.

Mavela Masondo, provinsiale polisiewoordvoerder, het bevestig dat ’n verkragtingsaak geopen en drie verdagtes in hegtenis geneem is.

“Die polisie kan nie verdere inligting bekend maak nie, aangesien die saak ’n minderjarige betrek en reeds voor die hof dien,” het Masondo destyds gesê.

Sekere besonderhede word op regsadvies weerhou om die minderjarige se identiteit te beskerm en verantwoordelike beriggewing te verseker.

Die bekendmaking van inligting in sake van hierdie aard bring bepaalde wetlike oorwegings mee, veral wanneer minderjariges betrokke is. Die besluit om sekere besonderhede voorlopig nie te publiseer nie, is nie daarop gemik om enige beskuldigde teen openbare kritiek te beskerm nie, maar om die regte van alle betrokkenes te respekteer en akkurate beriggewing te verseker.

Alle beskuldigdes word as onskuldig beskou totdat hul skuld bo redelike twyfel in ’n hof bewys is.

Breaking news at your fingertips… Follow Caxton Network News on Facebook and join our WhatsApp channel.

Nuus wat saakmaak. Volg Caxton Netwerk-nuus op Facebook en sluit aan by ons WhatsApp-kanaal.

Read original story on www.citizen.co.za

At Caxton, every story is written by humans. We use AI only to perform quality checks - never to generate the news. Happy reading!

Support local journalism

Add The Citizen as a preferred source to see more from Network News in Google News and Top Stories.

Wayne van der Walt

Wayne van der Walt, with around 15 years in the media industry, is editor of Highvelder Newspaper. His accolades include Frewin Awards for Newspaper of the Year and Front Page of the Year, and FCJ Photographer of the Year, among other honours.
Back to top button